gul ko mahbub ham-qayas kiya

gul ko mahbūb ham-qayās kiyā
farq niklā bahut jo baas kiyā

dil ne ham ko misāl-e-ā.īna
ek aalam kā rū-shanās kiyā

kuchh nahīñ sūjhtā hameñ us bin
shauq ne ham ko be-havās kiyā

ishq meñ ham hue na dīvāne
qais kī aabrū kā paas kiyā

daur se charḳh ke nikal na sake
zof ne ham ko mūrtās kiyā

sub.h tak sham.a sar ko dhuntī rahī
kyā patiñge ne iltimās kiyā

tujh se kyā kyā tavaqqo.eñ thiiñ hameñ
so tire zulm ne nirās kiyā

aise vahshī kahāñ haiñ ai ḳhūbāñ
‘mīr’ ko tum abas udaas kiyā

Print Friendly, PDF & Email

Leave a Reply

Your email address will not be published. Required fields are marked *