hoti hai garche kahne se yaro parai baat

hotī hai garche kahne se yaaro parā.ī baat
par ham se to thambe na kabhū muñh par aa.ī baat

jaane na tujh ko jo ye tasanño tū us se kar
tis par bhī to chhupī nahīñ rahtī banā.ī baat

lag kar tadrau rah ga.e dīvār-e-bāġh se
raftār kī jo terī sabā ne chalā.ī baat

kahte the us se miliye to kyā kyā na kahiye lek
vo aa gayā to sāmne us ke na aa.ī baat

ab to hue haiñ ham bhī tire Dhab se āshnā
vaañ tū ne kuchh kahā ki idhar ham ne paa.ī baat

bulbul ke bolne meñ sab andāz haiñ mire
poshīda kab rahe hai kisū kī uḌaa.ī baat

bhaḌkā thā raat dekh ke vo shola-ḳhū mujhe
kuchh rū-siyah raqīb ne shāyad lagā.ī baat

aalam siyāh-ḳhāna hai kis kā ki roz o shab
ye shor hai ki detī nahīñ kuchh sunā.ī baat

ik din kahā thā ye ki ḳhamoshī meñ hai vaqār
so mujh se hī suḳhan nahīñ maiñ jo batā.ī baat

ab mujh za.īf-o-zār ko mat kuchh kahā karo
jaatī nahīñ hai mujh se kisū kī uThā.ī baat

ḳhat likhte likhte ‘mīr’ ne daftar kiye ravāñ
ifrāt-e-ishtiyāq ne āḳhir baḌhā.ī baat

Print Friendly, PDF & Email

Leave a Reply

Your email address will not be published. Required fields are marked *