jo kaho tum so hai baja sahab

jo kaho tum so hai bajā sāhab
ham bure hī sahī bhalā sāhab

saada zehnī meñ nukta-chīñ the tum
ab to haiñ harf āshnā sāhab

na diyā rahm Tuk butoñ ke ta.iiñ
kyā kiyā haa.e ye ḳhudā sāhab

bandagī ek apnī kyā kam hai
aur kuchh tum se kahiye kyā sāhab

mehr afzā hai muñh tumhārā hī
kuchh ġhazab to nahīñ huā sāhab

ḳhat ke phaTne kā tum se kyā shikva
apne taale kā ye likhā sāhab

phir ga.iiñ āñkheñ tum na aan phire
dekhā tum ko bhī vaah vā sāhab

shauq-e-ruḳh yād-e-lab ġham-e-dīdār
jī meñ kyā kyā mire rahā sāhab

bhuul jaanā nahīñ ġhulām kā ḳhuub
yaad ḳhātir rahe mirā sāhab

kin ne sun sher ‘mīr’ ye na kahā
kahiyo phir haa.e kyā kahā sāhab

Print Friendly, PDF & Email

Leave a Reply

Your email address will not be published. Required fields are marked *