kash uThen hum bhi gunahgaron ke bich

kaash uTheñ ham bhī gunahgāroñ ke biich
hoñ jo rahmat ke sazā-vāroñ ke biich

jī sadā un abrūoñ hī meñ rahā
kī basar ham umr talvāroñ ke biich

chashm ho to ā.īna-ḳhāna hai dahr
muñh nazar aatā hai dīvāroñ ke biich

haiñ anāsir kī ye sūrat bāziyāñ
shobade kyā kyā haiñ un chāroñ ke biich

jab se le niklā hai tū ye jins-e-husn
paḌ ga.ī hai dhuum bāzāroñ ke biich

āshiqī o bekasī o raftagī
jī rahā kab aise āzāroñ ke biich

jo sarishk us maah bin jhamke hai shab
vo chamak kaahe ko hai tāroñ ke biich

us ke ātishnāk ruḳhsāroñ baġhair
loTiye yuuñ kab tak añgāroñ ke biich

baiThnā ġhairoñ meñ kab hai nañg-e-yār
phuul gul hote hī haiñ ḳhāroñ ke biich

yaaro mat us kā fareb-e-mehr khaao
‘mīr’ bhī the us ke hī yāroñ ke biich

Print Friendly, PDF & Email

Leave a Reply

Your email address will not be published. Required fields are marked *