KHatir kare hai jama wo har bar ek tarah

ḳhātir kare hai jamā vo har baar ek tarah
kartā hai charḳh mujh se na.e yaar ek tarah

maiñ aur qais o kohkan ab jo zabāñ pe haiñ
maare ga.e haiñ sab ye gunahgār ek tarah

manzūr us ko parde meñ haiñ be-hijābiyāñ
kis se huā do-chār vo ayyār ek tarah

sab tarheñ us kī apnī nazar meñ thiiñ kyā kaheñ
par ham bhī ho ga.e haiñ giraftār ek tarah

ghar us ke jā ke aate haiñ pāmāl ho ke ham
kariye makāñ hī ab sar-e-bāzār ek tarah

gah gul hai gaah rañg gahe baaġh kī hai bū
aatā nahīñ nazar vo tarah-dār ek tarah

nairañg husn-e-dost se kar āñkheñ āshnā
mumkin nahīñ vagarna ho dīdār ek tarah

sau tarah tarah dekh tabīboñ ne ye kahā
sehat pazīr hue ye bīmār ek tarah

so bhī hazār tarah se Thaharāvte haiñ ham
taskīn ke liye tirī nā-chār ek tarah

bin jī diye ho koī tarah fā.eda nahīñ
gar hai to ye hai ai jigar afgār ek tarah

har tarah tū zalīl hī rakhtā hai ‘mīr’ ko
hotā hai āshiqī meñ koī ḳhvār ek tarah

Print Friendly, PDF & Email

Leave a Reply

Your email address will not be published. Required fields are marked *