kya kahen aatish-e-hijran se gale jate hain

kyā kaheñ ātish-e-hijrāñ se gale jaate haiñ
chhātiyāñ sulgeñ haiñ aisī ki jale jaate haiñ

gauhar-e-gosh kisū kā nahīñ jī se jaatā
aañsū motī se mire muñh pe Dhale jaate haiñ

yahī masdūd hai kuchh rāh-e-vafā varna baham
sab kahīñ naama o paiġhām chale jaate haiñ

bār-e-hirmān-o-gul-o-dāġh nahīñ apne saath
shajar-e-bāġh-e-vafā phūle phale jaate haiñ

hairat-e-ishq meñ tasvīr se rafta hī rahe
aise jaate haiñ jo ham bhī to bhale jaate haiñ

hijr kī koft jo khīñche haiñ unhīñ se pūchho
dil diye jaate haiñ jī apne male jaate haiñ

yād-e-qad meñ tire āñkhoñ se baheñ haiñ jueñ
gar kisū baaġh meñ ham sarv tale jaate haiñ

dekheñ pesh aave hai kyā ishq meñ ab to juuñ sail
ham bhī is raah meñ sar gaaḌe chale jaate haiñ

pur-ġhubāri-e-jahāñ se nahīñ sudh ‘mīr’ hameñ
gard itnī hai ki miTTī meñ rule jaate haiñ

Print Friendly, PDF & Email

Leave a Reply

Your email address will not be published. Required fields are marked *