kya main bhi pareshani-e-KHatir se qarin tha

kyā maiñ bhī pareshāni-e-ḳhātir se qarīñ thā
āñkheñ to kahīñ thiiñ dil-e-ġham-dīda kahīñ thā

kis raat nazar kī hai sū-e-chashmak-e-anjum
āñkhoñ ke tale apne to vo māh-jabīñ thā

aayā to sahī vo koī dam ke liye lekin
hoñThoñ pe mire jab nafas-e-bāz-pasīñ thā

ab koft se hijrāñ kī jahāñ tan pe rakhā haath
jo dard o alam thā so kahe tū ki vahīñ thā

jaanā nahīñ kuchh juz ġhazal aa kar ke jahāñ meñ
kal mere tasarruf meñ yahī qit.a zamīñ thā

naam aaj koī yaañ nahīñ letā hai unhoñ kā
jin logoñ ke kal mulk ye sab zer-e-nagīñ thā

masjid meñ imaam aaj huā aa ke vahāñ se
kal tak to yahī ‘mīr’ ḳharābāt-nashīñ thā

Print Friendly, PDF & Email

Leave a Reply

Your email address will not be published. Required fields are marked *