makka gaya madina gaya karbala gaya

makka gayā madīna gayā karbalā gayā
jaisā gayā thā vaisā hī chal phir ke aa gayā

dekhā ho kuchh us āmad-o-shud meñ to maiñ kahūñ
ḳhud gum huā huuñ baat kī tah ab jo pā gayā

kapḌe gale ke mere na hoñ āb-dīda kyuuñ
mānind-e-abr-e-dīda-e-tar ab to chhā gayā

jāñ-soz aah o naala samajhtā nahīñ huuñ maiñ
yak shola mere dil se uThā thā jalā gayā

vo mujh se bhāgtā hī phirā kibr-o-nāz se
juuñ juuñ niyāz kar ke maiñ us se lagā gayā

jor-e-sip.har-e-dūñ se burā haal thā bahut
maiñ sharm-e-nā-kasī se zamīñ meñ samā gayā

dekhā jo raah jaate tabaḳhtūr ke saath use
phir mujh shikasta-pā se na ik-dam rahā gayā

baiThā to boriye ke ta.iiñ sar pe rakh ke ‘mīr’
saf kis adab se ham fuqarā kī uThā gayā

Print Friendly, PDF & Email

Leave a Reply

Your email address will not be published. Required fields are marked *