manind-e-shama-majlis shab ashk-bar paya

mānind-e-shama.a-majlis shab ashk-bār paayā
al-qissa ‘mīr’ ko ham be-iḳhtiyār paayā

ahvāl ḳhush unhoñ kā ham-bazm haiñ jo tere
afsos hai ki ham ne vaañ kā na baar paayā

jiite jo zof ho kar zaḳhm-e-rasā se us ke
siine ko chaak dekhā dil ko figār paayā

shahr-e-dil ek muddat ujḌā basā ġhamoñ meñ
āḳhir ujaaḌ denā us kā qarār paayā

itnā na tujh se milte ne dil ko kho ke rote
jaisā kiyā thā ham ne vaisā hī yaar paayā

kyā e’tibār yaañ kā phir us ko ḳhvār dekhā
jis ne jahāñ meñ aa kar kuchh e’tibār paayā

aahoñ ke shole jis jā uThte the ‘mīr’ se shab
vaañ jā ke sub.h dekhā musht-e-ġhubār paayā

Print Friendly, PDF & Email

Leave a Reply

Your email address will not be published. Required fields are marked *