shikwa karun main kab tak us apne mehrban ka

shikva karūñ maiñ kab tak us apne mehrbāñ kā
al-qissa rafta rafta dushman huā hai jaañ kā

girye pe rañg aayā qaid-e-qafas se shāyad
ḳhuuñ ho gayā jigar meñ ab daaġh gulsitāñ kā

le jhāḌū Tokrā hī aatā hai subah hote
jārūb-kash magar hai ḳhurshīd us ke haañ kā

dī aag rañg-e-gul ne vaañ ai sabā chaman ko
yaañ ham jale qafas meñ sun haal āshiyāñ kā

har subah mere sar par ik hādsa nayā hai
paivand ho zamīñ kā sheva us āsmāñ kā

in said afganoñ kā kyā ho shikār koī
hotā nahīñ hai āḳhir kaam un ke imtihāñ kā

tab to mujhe kiyā thā tīroñ se said apnā
ab karte haiñ nishāna har mere ustuḳhvāñ kā

fitrāk jis kā aksar lohū meñ tar rahe hai
vo qasd kab kare hai is said nā-tavāñ kā

kam fursatī jahāñ ke majme kī kuchh na pūchho
ahvāl kyā kahūñ maiñ is majlis-e-ravāñ kā

sajda kareñ haiñ sun kar obāsh saare us ko
sayyad pisar vo pyārā haigā imaam bāñkā

nā-haq shanāsī hai ye zāhid na kar barābar
taa.at se sau baras kī sajda us āstāñ kā

haiñ dasht ab ye jiite baste the shahr saare
vīrāna-e-kohan hai māmūra is jahāñ kā

jis din ki us ke muñh se burqā uThegā suniyo
us roz se jahāñ meñ ḳhurshīd phir na jhāñkā

nā-haq ye zulm karnā insāf kah pyāre
hai kaun sī jagah kā kis shahr kā kahāñ kā

saudā.ī ho to rakkhe bāzār-e-ishq meñ pā
sar muft bechte haiñ ye kuchh chalan hai vaañ kā

sau gaalī ek chashmak itnā sulūk to hai
obāsh ḳhāna jañg us ḳhush chashm bad-zabāñ kā

yā ro.e yā rulāyā apnī to yuuñ hī guzrī
kyā zikr ham-safīrāñ yārān-e-shādmāñ kā

qaid-e-qafas meñ haiñ to ḳhidmat hai nālagī kī
gulshan meñ the to ham ko mansab thā rauza ḳhvāñ kā

pūchho to ‘mīr’ se kyā koī nazar paḌā hai
chehrā utar rahā hai kuchh aaj us javāñ kā

Print Friendly, PDF & Email

Leave a Reply

Your email address will not be published. Required fields are marked *