ta-ba maqdur intizar kiya

tā-ba maqdūr intizār kiyā
dil ne ab zor be-qarār kiyā

dushmanī ham se kī zamāne ne
ki jafākār tujh sā yaar kiyā

ye tavahhum kā kār-ḳhāna hai
yaañ vahī hai jo e’tibār kiyā

ek nāvak ne us kī mizhgāñ ke
tā.er-e-sidra tak shikār kiyā

sad-rag-e-jāñ ko taab de bāham
terī zulfoñ kā ek taar kiyā

ham faqīroñ se be-adā.ī kyā
aan baiThe jo tum ne pyaar kiyā

saḳht kāfir thā jin ne pahle ‘mīr’
maz.hab-e-ishq iḳhtiyār kiyā

Print Friendly, PDF & Email

Leave a Reply

Your email address will not be published. Required fields are marked *